☭ marselip0910 叶俊华™

Amusic 09年力捧男新人李治廷（Aarif）最新單曲《今天開始》。李治廷（Aarif），一副模特兒型格，加上有馬來西亞血統，驟眼看來似乎是不懂看中文、滿口流利英語的ABC，但事實上Aarif絕對是位非一般混血兒，演而優則唱之餘，曲詞編監亦冇問題，足料新人王當之無愧！

正當眾人關注(口靚)界女神文詠珊（Janice Man）是否加盟黎明大軍之際，現年22歲的Aarif已經默默耕耘密密做，處男電影《1969太空漫遊》夥拍影后吳君如與影帝任達華，飾演兩人的兒子已夠睇頭。雖然Aarif只有一首派臺歌《Fly away》，未見大碟面世，但其音樂才華早已在師姐衞蘭（Janice）全新英文碟《Morning》嶄露頭角，皆因大碟內歌詞由Aarif一手包辦，認真巴閉！操一口流利廣東話的Aarif說：「初初落筆嘅時候都幾大壓力，因為自己唔識用女仔角度去寫，利用唔到Janice一把好可愛又柔和嘅聲音。」

至於Aarif的處男專輯，則由他包辦曲、編、監，預計能於10月「誕生」，他說：「過程係好艱難，所有嘢都難，不過學到好多嘢，要克服只有不停聽住首歌，花時間去『磨』，學識咗要放膽試，唔可以咁固執。」Aarif表示雷頌德（Mark）是他的指南針，對其直率性格更有讚冇彈：「好鍾意阿Mark講說話直接，一啲都唔惡，好過癮！（傳授秘笈？）冇話傳唔傳授秘笈，只係佢一句說話叫我唔使擔心，已經好有力量，畀到我好大信心！」要在蕓蕓新人中脫穎而出實在不容易，問到踏入娛樂圈第一個年頭有甚麼目標？Aarif坦言未有時間去想，問他有何「獨特之處」，他謙虛地說：「呢個要留番畀觀眾去衡量，自己只希望喺唔同方面不斷有進步！」